ನನ್ನೊಡತಿ

(A small dedication to Kodagu)

ನನ್ನೊಡತಿ,
ಮಡಿಕೇರಿ ಮಣ್ಣ ಕನ್ನಡತಿ,                             
                               
ಕಾವೇರಿಯ ಮಗಳು,
ಶಾಂತಲೆಯೇ ನಗಲು,
ಚೆಂದಗಾತಿ,
ಕೊಡಗಿನ ಕಾಂತಿ,
ನನ್ನೊಡತಿ,
ಮಡಿಕೇರಿ ಮಣ್ಣ ಕನ್ನಡತಿ...
                                  
ಇಬ್ಬನಿಲಿ ನೆಂದ ಇಗ್ಗುತಪ್ಪನ
ನೆತ್ತಿಯಿಂದಿಳಿದು ಬೆವರಂತೆ ಬಾರೇ ಭಾಗೀರಥಿ...
ಮಬ್ಬಿನಲಿ ನಿಂದ ಮಂದಹಾಸವನೆಲ್ಲಾ
ತಬ್ಬಿ ಮಗುವಂತೆ ತಾರೇ ಭಾಗ್ಯವತಿ...
ಅಂದಗಾತಿ,
ಹುತ್ತರಿಯ ಹೂವಿನಾರತಿ...
ಸ್ವಪ್ನಗಾತಿ,
ಮಲೆನಾಡಿನ ಮೊಗಕೆ ಮೂಗುತಿ...
ನನ್ನೊಡತಿ,
ಮಡಿಕೇರಿ ಮಣ್ಣ ಕನ್ನಡತಿ...
                                  
ಅಬ್ಬಿ ಹಸಿರಿಂದ ಹಬ್ಬದಿಗ್ಗಿನಲಿ
ದಿಬ್ಬವನತ್ತಿಳಿದು ಹಿಮದಂತೆ ಹರಿವ ಶಾಕುಂತಿ...
ಕಣ್ಣ ಬಸಿರಿಂದ, ನನ್ನ ಕನಸುಗಳಿಗೆಲ್ಲಾ
ನಿತ್ಯ ಪ್ರೀತಿಯನು ಹೆರುವ ಬಾಣಂತಿ...
ಪ್ರೇಮಜ್ಯೋತಿ,
ಬೆಳದಿಂಗಳ ಬಾನಿನ ಶಾಂತಿ...
ಹೇ, ಸಂಗಾತಿ,
ನಾವೇ ನವಯುಗ ನಳ-ದಮಯಂತಿ...
ನನ್ನೊಡತಿ,
ಮಡಿಕೇರಿ ಮಣ್ಣ ಕನ್ನಡತಿ...
                                  
ಕಾವೇರಿಯ ಮಗಳು,
ಶಾಂತಲೆಯೇ ನಗಲು,
ಚೆಂದಗಾತಿ,
ಕೊಡಗಿನ, ಕಾಂತಿ,
ನನ್ನೊಡತಿ,
ಮಡಿಕೇರಿ ಮಣ್ಣ ಕನ್ನಡತಿ...
                                  
                        - ಸಂಪತ್ ಕುಮಾರ್