ನಾನು,..

ನಾನು,.. ನಿನ್ನ ಕಣ್ಣ ನೀಲಿ ಕಡಲಲ್ಲಾಡೋ ಮೀನು,

ನಾನು,.. ನಿನ್ನ ಕೆನ್ನೆ ದಿಣ್ಣೆಯ ಮುಸ್ಸಂಜೆ ಬಾನು,

ನಾನು,.. ಉನ್ಮತ್ಥನಾಗೋ ಹೊಂಗನಸೇ ನೀನು...

ನೀನು,   ಕನ್ನಡಿಯಲಿ ಕಾಣೋ ಪ್ರತಿಬಿಂಬ ನಾನು,

ನೀನು,   ಏಕಾಂತದಿ ನುಡಿಯೋ ಪಿಸುದನಿಯೇ ನಾನು,

ನೀನು,.. ನಕ್ಕಾಗ ನಿನ್ನ ಕೆನ್ನೆ ಗುಳಿಯೇ ನಾನು...

* * *

ಆಲಿಸು,,,

ಆಲಂಗಿಸು,,,

ಆಗೊಮ್ಮೆ ಈಗೊಮ್ಮೆ ನಿನ್ನಲ್ಲಿ ಅಂಕುರಿಸೋ ಅಂಜಿಕೆಯ

ಮುತ್ತಾಗಿ ನನ್ನೆದೆಗೆ ನೀ ಅರ್ಪಿಸು...

ಹೋಲಿಸು,,,

ಆಲೋಚಿಸು,,,

ಒಟ್ಟಾರೆ ಒಲವಾಗಿ ನಿನ್ನಲ್ಲಿ ಝೇoಕರಿಸೋ ಸಂಭ್ರಮವ

ಅಲೆಯಾಗಿ ನನ್ನೆಡೆಗೆ ನೀ ತೇಲಿಸು...

ನಾನು,.. ನಿನ್ನ ತುಟಿಯ ಹೂವಿನ ಸಿಹಿಯಾದ ಜೇನು,

ನಾನು,.. ನನಗಿಂತ ಪ್ರೀತಿಸೋ ನನ್ನವಳೇ ನೀನು, 

ನೀನು,.. ನನ್ನೆಲ್ಲಾ ಭಾವವ ಪ್ರಿಯವಾಗಿ ಕಾಣು,..

* * *

ಆಶಿಸು,..

ಆನಂದಿಸು,..

ನೀ ಬೀರೋ ಪ್ರತಿನೋಟ ನನ್ನನ್ನೇ ದಿಟ್ಟಿಸಲಿ ಎಂಬೆಲ್ಲ

ಆಸೆಗಳ ನಿನ್ನಲ್ಲು ನೀ ಪೋಷಿಸು...

ಹರ್ಷಿಸು,..

ಆಕರ್ಷಿಸು,..

ಅನುಗಾಲ ನಿನ್ನನ್ನು ಹಂಬಲಿಸಿ ಎಲ್ಲೆಲ್ಲೊ ಅಲೆವಾಗ

ಮೃದುವಾಗಿ ನನ್ನೆದೆಯ ನೀ ಸ್ಪರ್ಶಿಸು...

ನಾನು,.. ನಿನ್ನ ಕಣ್ಣ ನೀಲಿ ಕಡಲಲ್ಲಾಡೋ ಮೀನು,

ನಾನು,.. ನಿನ್ನ ಕೆನ್ನೆ ದಿಣ್ಣೆಯ ಮುಸ್ಸಂಜೆ ಬಾನು,

ನಾನು,.. ಉನ್ಮತ್ಥನಾಗೋ ಹೊಂಗನಸೇ ನೀನು...

ನೀನು,   ಕನ್ನಡಿಯಲಿ ಕಾಣೋ ಪ್ರತಿಬಿಂಬ ನಾನು...

ನೀನು,   ಏಕಾಂತದಿ ನುಡಿಯೋ ಪಿಸುದನಿಯೇ ನಾನು...

ನೀನು,.. ನಕ್ಕಾಗ ನಿನ್ನ ಕೆನ್ನೆ ಗುಳಿಯೇ ನಾನು...

                                           - ಸಂಪತ್ ಕುಮಾರ್

ಕಾಯುವಾಗೆಲ್ಲಾ ನಿನ್ನ... (ಯುಗಳ ಗೀತೆ)

ಗಂ: ಕಾಯುವಾಗೆಲ್ಲಾ ನಿನ್ನ, ಕನಸುಗಳು ಮೂಡಿವೆ
        ಕಣ್ಣ ಕುಂಚದಲ್ಲಿ ಬಣ್ಣ ನೂರು ನಿನ್ನವೇ, ಭಾವಚಿತ್ರ ಬಿಡಿಸಿವೆ...

        ನೋಡುವಾಗೆಲ್ಲಾ ನಿನ್ನ, ಮಾಯೆಯೊಂದು ಕಾಡಿದೆ

        ಸ್ವಪ್ನ ರಂಗದಲ್ಲಿ ಪ್ರೇಮ ಸೂತ್ರ ನಿನ್ನದೇ, ಪಾತ್ರಪದ್ಯ ಹಾಡಿದೆ... 

ಗಂ: ಎದೆ ವೀಣೆಯಲ್ಲಡಗಿ ಕುಳಿತಿಹಾ ರಾಗ

        ನಿನ ಬೆರಳನೇ ಬಯಸುತ್ತಿದೆ...

        ಸಮ್ಮೌನ ಸೆಲೆಯಾಗಿ ವಿರಮಿಸಿ ಈಗ

        ತುಟಿ ಕೊಳಲನೇ ನುಡಿಸುತ್ತಿದೆ...

ಹೆ:  ಶಬ್ದಲೋಕದಲ್ಲಿ,,, ನಿಶ್ಶಬ್ಧ ನಮ್ಮ ಪ್ರೇಮ...

       ಮೌನಗೀತೆಯಲ್ಲೊಂದು ಮುದ್ದಾದ ಭಾವನೆಯ ನೀ ಬಿಂಬಿಸು.

------------------------------------------------------------------

ಗಂ: ನಗಿಸುವಾಗೆಲ್ಲಾ ನಿನ್ನ, ತಾರೆಗಳೂ ನಕ್ಕಿವೆ 

        ಮನದ ಹಾಳೆಯಲ್ಲಿ ಖಾಲಿಯಿದ್ದ ಹಾಡಿಗೆ ಸಾಲುಗಳು ಸಿಕ್ಕಿವೆ...

------------------------------------------------------------------

ಗಂ: ಸೌಗಂಧ ಸುಧೆಯೇರಿ ಹೊರಟಿಹಾ ಯಾನ 

       ನೀ ಜೀವಿಸೋ ಪ್ರತಿ ಶ್ವಾಸವೂ...

       ಕಾತುರತೆ ಕರೆಯಾಗಿ ಸೆಳೆಯುವಾ ತಾಣ 

       ನೀ ಸಂಧಿಸೋ ಪ್ರತಿ ದಾರಿಯೂ...
 

ಹೆ:  ವರ್ಷಮಾಲೆಯಲ್ಲಿ,,, ಸ್ವಾತಿ ನಮ್ಮ ಪ್ರೇಮ...

       ಶುಭ್ರವಾಗಿ ಕೈಸೇರಿ ಮುತ್ತಾಗೊ ಮಳೆಹನಿಯ ನೀ ಯಾಚಿಸು.

ಗಂ: ಕಾಯುವಾಗೆಲ್ಲಾ ನಿನ್ನ, ಕನಸುಗಳು ಮೂಡಿವೆ

       ಕಣ್ಣ ಕುಂಚದಲ್ಲಿ ಬಣ್ಣ ನೂರು ನಿನ್ನವೇ, ಭಾವಚಿತ್ರ ಬಿಡಿಸಿವೆ...

       ನೋಡುವಾಗೆಲ್ಲಾ ನಿನ್ನ, ಮಾಯೆಯೊಂದು ಕಾಡಿದೆ

       ಸ್ವಪ್ನ ರಂಗದಲ್ಲಿ ಪ್ರೇಮ ಸೂತ್ರ ನಿನ್ನದೇ, ಪಾತ್ರಪದ್ಯ ಹಾಡಿದೆ...

                                            - ಸಂಪತ್ ಕುಮಾರ್

ಇಷ್ಟೇ ನನ್ನಾ ಬಯಕೆ

ಇಷ್ಟೇ ನನ್ನಾ ಬಯಕೆ

ಇಷ್ಟೇ ನನ್ನಾ ಹರಕೆ 

ನಂದಿಷ್ಟೇ ವ್ಯಕ್ತ ಕನವರಿಕೆ, ಪ್ರೀತಿಸು ಬಾರೆ ಬಾ...

ಇಷ್ಟೇ ನನ್ನಾ ಆಸೆ 

ಇಷ್ಟೇ ನನ್ನಾ ಭಾಷೆ 

ನಂದಿಷ್ಟೇ ತಪ್ತ ಗುನುಗುನಿಕೆ, ಪ್ರೀತಿಸು ಬಾರೆ ಬಾ...

ಹೆದರೊ, ಹೆದರೋ ಈ ವಯಸು

ಬೆದರೊ, ಬೆದರೋ ಕಣ್ ಕನಸು

ಬೇವರೊ, ಬೆವರೋ ಮೈಮನಸು, ತಾಳಲಾರೆ ನಾ...

ಚಲನ ವಲನ ಕಣ್ಣಲ್ಲೇ

ಮಿಲನ ಮಿಲನ ನನ್ನಲ್ಲೇ

ಸುಮನ ಗಮನ ಬಾನಲ್ಲೇ, ಹೇಳಲಾರೆ ನಾ...

-------------------------------------------------------------------------

ಕಣ್ಣ ತುಂಬೆಲ್ಲಾ ನೀನೆ ನಿಂತಿರೆ, ಹೇಗೆ ಬರಲಮ್ಮ ನಾ ಮರಳಿ ಪ್ರಜ್ಞೆಗೆ

ಯಾರ ಹಂಗಿಲ್ಲ, ಯಾರೂ ಬೇಕಿಲ್ಲ, ಮನದಿ ಮಾತಾಡೊ ಪ್ರೀತಿಗೆ...

ಉರುಳಿ ಉರುಳಿ ಹೋಗಲಿ ಕಾಲ 

ಉಳಿದು ಉಳಿದು ಕಾಯುವೆ ಬದುಕೆಲ್ಲಾ...

ಕಳೆದು ಕಳೆದು ಹೋಗಲಿ ಉಸಿರು 

ಬೆಳೆದು ಬೆಳೆದು ಬಾಳಲಿ ಈ ಪ್ರೀತೀ...

ಬಂದು ಸೇರು ನೀ, ಬಾಹು ಕವಚಕ್ಕೆ ನನ್ನ ಆಹ್ವಾನ ಕಾಯದೆ 

ಸ್ಪರ್ಶ ಮಾತಾಡಿ ಗೀತೆ ಗುನುಗಲಿ, ನಾನು ನಿನಗೇನೂ ನೀನು ನನಗೇನೂ ಹೇಳದೆ...

-------------------------------------------------------------------------

ಹಣಿಸೋ, ಮಣಿಸೋ ಈ ಚಳೀಲಿ

ನೆನೆಸೋ, ನೆನೆಸೋ ಮಳೇಲಿ

ಇರು ನೀ, ಇರು ನೀ ಎದೆಯ ಗೂಡಲ್ಲೇ...

ನಡುಗೋ, ನಡುಗೋ ಮೈಯಲ್ಲೂ 

ಉಡುಗೋ, ಉಡುಗೋ ಉಸಿರಲ್ಲೂ 

ಇರು ನೀ, ಇರು ನೀ ಎದೆಯ ಗೂಡಲ್ಲೇ...

ನಿನ್ನಾ ತೋಳಲ್ಲೇ ಸತ್ಕರಿಸೇ

ಮುಂಗುರುಳಲ್ಲೇ ನೇವರಿಸೆ

ನಂದಿಷ್ಟೇ ಸ್ಪಷ್ಟ ಚಡಪಡಿಕೆ, ಪ್ರೀತಿಸು ಬಾರೆ ಬಾ...

ಇಷ್ಟೇ ನನ್ನಾ ಆಸೆ

ಇಷ್ಟೇ ನನ್ನಾ ಭಾಷೆ 

ನಂದಿಷ್ಟೇ ತಪ್ತ ಗುನುಗುನಿಕೆ, ಪ್ರೀತಿಸು ಬಾರೆ ಬಾ...

                                                 - ಸಂಪತ್ ಕುಮಾರ್

ಮದ್ರಾಸಿ ಮಣ್ಣವಳು

ಮದ್ರಾಸಿ ಮಣ್ಣಲ್ಲಿ 

ಮಲ್ಲಿಗೆ ಮೊಗ್ಗು ಅರಳಿದಂಗೆ

ಶ್ರಾವಣೀನ ಕಂಡಾಗ ಸೋತೊಗಿದ್ದೆ,

ಅವಳ್ಯಾರೋ, ಯಾವೂರೋ,

ಗೊತ್ತಿಲ್ಲ, ಚಿಂತಿಲ್ಲ,

ನನ್ ಪಾಡಿಗೆ ನಾ ಪ್ರೀತಿಸ್ತಾ, ನಿಂತ್ಕಂಡಿದ್ದೆ...

ಅವಳಿಗೂ ಹಂಗೇನೇ ಅಂದ್ಕಂಡಿದ್ದೆ ...

ಏನಿತ್ತೋ, ಯಾರಿಗೊತ್ತು,

ಹೇಗೋಯ್ತೋ, ಯಾರಿಗೊತ್ತು,

ಎರಡು ದಿನ ಕಳೆದೋಯ್ತು, ಅವಳ ಜೊತೆಗೇನೆ,

ಯಾರಯಾರು ಜೋತೆಗಿದ್ರೋ

ದೇವ್ರಾಣೆ ನೆನಪಿಲ್ಲ

ಅವಳುಟ್ಟಿದ್ದ ಆ ಹಸಿರು ಸೀರೆ ಬಿಟ್ಟ್ರೆ...

ಆ ಸೀರೆ ಸೆರಗಿನ ಹೂವ ಬಿಟ್ಟ್ರೆ...

ಉರಿಬಿಸಿಲಲ್ಲಿ ಮಳೆಬಂದು,

ನಿಂತೊದಾಗ ತಂಪಾದಂಗೆ,

ತಣ್ಣಗಿತ್ತು ನಿನ್ನೊಟ್ಟಿಗೆ, ಈ ನನ್ ಜೀವಾ,

ಮಳೆನಿಂತ್ರು ಮರದಹನಿ

ನಿಲ್ಲೋಲ್ಲ ಅನ್ನೋ ಹಂಗೆ

ಎದೆಗೊತ್ತಿ ಬರ್ತಿದ್ದಾ ವಿರಹದ ಕಾವಾ,

ನೆನೆನೆನೆದು ಸಾಲಿಸ್ತು, ಕಣ್ಣಿನ  ತೇವಾ...

ಚೆಂದಾನೆ ಹೈದೇರ

ನೋಡಿದೇಟ್ಗೆ ಪ್ರೀತ್ಸೋನು 

ನಂಗೇನು ಹೊಸದಲ್ಲ, ಪ್ರೀತಿ ಪ್ರೇಮ...

ಎಗ್ಗಿಲ್ದೆ, ಹೆಣ್ಣಿಂದ್ ಹೆಣ್ಣಿಗೆ

ಹಾರಾಡೋ ಮನಸನ್ನೂ 

ಬಲೆಹಾಕಿ ಹಿಡಿದೊಳು, ಶ್ರಾವಣಿ ನೀನೆ...

ಬಲೆಗೆ ಬಿದ್ದ, ಗಂಡುನವಿಲು ನಾನೇ...

ಮದ್ರಾಸಿ ಮಣ್ಣಲ್ಲಿ 

ಮಲ್ಲಿಗೆ ಮೊಗ್ಗು ಅರಳಿದಂಗೆ 

ಶ್ರಾವಣೀನ ಕಂಡಾಗ ಸೋತೊಗಿದ್ದೆ,..

ನನ್ ಪಾಡಿಗೆ ನಾ ಪ್ರೀತಿಸ್ತಾ, ನಿಂತ್ಕಂಡಿದ್ದೆ...

                                               - ಸಂಪತ್ ಕುಮಾರ್