ನೀನೇ ತಾನೇ..?

ನೀನೇ ತಾನೇ, ನನ್ನ ಕನಸುಗಳು

ನಿನ್ನಿಂದಾನೇ ಎಲ್ಲ ಸೊಗಸುಗಳು

ಇನ್ನು ಏನೇ, ನಿನ್ನ ಮುನಿಸುಗಳು?

ನಕ್ಕುಬಿಡೇ ಒಮ್ಮೆ,

ಒಂದಾಗಲಿ ನಮ್ಮ ಮನಸುಗಳು...

    *    *    *

ಹೋಗೋಣ ಇನ್ನು, ಹಾಗೆ ತುಸು ದೂರ

ಕಾಯುತಿದೆ ನಮ್ಮ, ಆ ತುಂಗೆ ತೀರ...

ಮರಳ ಗೂಡನು ಕಟ್ಟಿ ಆಡೋಣ ಬಾ,,,

ಬೆರಳ ಕೂಡಿಸಿ ಹೆಸರ ಗೀಚೋಣ ಬಾ...

ನೆರಳ ನೋಡುತ, ಒರಗಿ ಕೂರೋಣ ಬಾ... 

ಚುಕ್ಕಿ ತಾರೆ ರತ್ನಗಳಿಗು, ಮಿಕ್ಕುಮೀರಿ ಮಿಂಚುವಂತ,,,

ನೀನೇ ತಾನೇ, ನನ್ನ ಬೆರಗುಗಳು

ನಿನ್ನಿಂದಾನೆ ಎಲ್ಲ, ಸೊಬಗುಗಳು

ಇನ್ನು ಏಕೇ ಸಣ್ಣ ಕೊರಗುಗಳು?

ಸಿಕ್ಕುಬಿಡೇ ಒಮ್ಮೆ,

ಹೆಚ್ಚಾಗಲಿ ನಮ್ಮ ಸಲುಗೆಗಳು... 

    *    *    * 

ನಾನಾದೆ ನಿನ್ನ, ಪ್ರೀತಿ ಸಾಲಗಾರ

ತೀರಿಸುವೆ ಎಲ್ಲ, ಜೀವನದ ಪೂರ... 

ಬದುಕ ಜಾಡನು ಜೊತೆ ಸಾಗೋಣ ಬಾ,,,

ದನಿಯ ಕೂಡಿಸಿ ಜೊತೆ ಹಾಡೋಣ ಬಾ,,,

ಒಲವ ಮೋಡದಿ ಮಳೆಯಾಗೋಣ ಬಾ...

ಬೀಳೋ ಎಲ್ಲ ಸ್ವಪ್ನಗಳಲು, ತೇಲಿಬಂದು ಸೇರುವಂತ,,,

ನೀನೇ ತಾನೇ, ನನ್ನ ಮಿಡಿತಗಳು

ನಿನ್ನಿಂದಾನೆ ಎಲ್ಲ ತುಡಿತಗಳು

ಇನ್ನು ಎಷ್ಟೇ, ನಿನ್ನ ಸೆಳೆತಗಳು?

ಅಪ್ಪಿಬಿಡೇ ಒಮ್ಮೆ,

ಒಂದಾಗಲಿ ಎದೆ ಬಡಿತಗಳು...

                                                                     - ಸಂಪತ್ ಕುಮಾರ್